MIND OF AN ANALYST
Agar aaj mai koi ek topic seekhta hun to ek din me mai use master nahi kar sakta. Mai kya karunga us topic ko mai kam se kam 15 din tak baar-baar repeat karke padunga. Isse koi farak nahi padta ki wo topic kitna chhota hai ya kitna bada, principle simple hai: repetition se mastery aati hai. Jab aap ek cheez ko baar-baar padhte hain, aapka mind us topic ke concepts ko apne aap sochne lagta hai. Dheere-dheere aapka dimaag connections banata hai, naye questions uthata hai, aur us topic ko deeper level par samajhne lagta hai.
Shuru mein shayad sab kuch yaad na rahe, kuch cheezein confuse karein, lekin jab aap 15 din tak lagataar ussi cheez ko revise karte hain, samay ke saath aapka dimaag naturally uske patterns, logic ko absorb kar leta hai. Har din aap thoda aur clear feel karte hain. Aur jab kisi topic ke around aapke dimaag mein clarity aati hai, to aap na sirf usse samajhne lagte hain balki apne shabdon mein dusron ko samjha bhi sakte hain aur wahi asli mastery ki pehchan hoti hai.
Isliye mai believe karta hoon: Seekhne ka asli raaz ek hi hai — consistency aur repetition. Ek din mein expert nahi ban sakte, lekin roz thoda thoda seekh kar 15 din mein aap kisi bhi topic ko apna bana sakte hain.
Ek baat hume samajhne ki zarurat hai ki Trading mein sab kuch seekhna zaruri nahi hai. Har indicator, har strategy, har theory ko master karna possible bhi nahi hai. Lekin jitna bhi hum seekhen, usse sahi tarike se seekhna aur real market mein use kar pana sabse zyada important hai. Kitaben padhne ya videos dekhne se kaam nahi chalega, asli skill tab develop hoti hai jab hum market mein apna gyaan apply karte hain.
Chahe aap bilkul shuruaat kar rahe ho, ya aapko thoda bahut basic jaankari hai — dono cases mein ek hi approach kaam karega: deep understanding aur consistent practice. Surface level par seekhkar trade karne se zyada nukhsaan hota hai. Hume concepts ke peeche ki psychology samajhni hogi: price movement kyun hota hai, demand-supply kaise kaam karta hai, big players kya soch rahe hain.
Agar mai aapki jagah hota, to mai kuch is tareeke se stock market seekhta:
- Clear Focus Set Karta: Sabse pehle mai decide karta ki mujhe kis segment mein kaam karna hai. Bina clear direction ke market mein ghusna self-destruction hai.
- Basics Ko Master Karta: Mai sabse pehle price action, support-resistance, trendlines, and basic candlestick patterns ko deeply samajhta. Ye market ka foundation hai.
- Daily Chart Reading Practice Karta: Rozana charts ko padhta bina kisi trade ke. Ye habit develop karta ki charts ko samajhna hai, predict nahi karna.
- Mistakes Ko Accept Aur Analyze Karta: Jab bhi galat trade hota ya koi analysis fail hota, mai usse emotional nahi hota. Mai apna trading journal maintain karta aur dekhta ki kaha decision-making mein flaw tha.
- Small Capital Se Start Karta: Badi-badi profits ke sapne dekhne ke bajaye, mai chhote capital se safe trading seekhta, risk management aur patience build karta.
- Self Testing: 15 din ya ek mahine baad mai apna analysis khud test karta bina kisi expert ki madad ke. Real improvement wahi se start hoti hai.
- Mindset Aur Discipline Pe Kaam Karta: Mai samajhta ki stock market sirf knowledge ka nahi, mindset aur emotional control ka game hai.
Is tareeke se seekhne se na sirf aapka technical analysis strong hota hai, balki aap ek independent aur confident trader bante hain. Trading ka asli maza tab aata hai jab aap market ke flow ke saath dance karte hain bina fear ke, bina greed ke.
TOPICS
Neeche ki saare topics one by one order me hai, pehle kya seekhna chahiyea baad me kya.
Itna kahunga apne aap ko challenge dijiyea aur ek din me ek topic hi padhe aur 15 din tak usko mastery kare.